சரஸ்வதி படிப்புக்கு கடவுள்... அப்புறம் ஏன் அதிகப்படியான மக்கள் படிக்கவில்லை?

பல யுகங்களாக உள்ள இந்து மதத்தில் கல்விக்கென்று  தனிக்கடவுள். அதற்கு பல பெயர்கள்..... அந்த பெயர்களை படிக்கவே பள்ளிக்கூடம் போகணும். இப்படி கல்விக்கு தனிக்கடவுள் வைத்துள்ள இந்து மதத்தில் உள்ள 95% மக்கள் ஏன் படிக்காமல் இருந்தனர்? அவர்களின் படிப்பை யார் தடுத்தது? ஒவ்வொரு புரட்டாதி மாதத்திலும் தவறாமல் சரஸ்வதி பூசை கொண்டாடி வரும் மக்களை ஏன் அந்த சரஸ்வதி படிக்க வைக்கவில்லை?

சிறு வயதில் சரஸ்வதி சபதம் படம் பார்த்து ஒரு ஊமையை தமிழில் பண் இசைக்கும் அளவுக்கு சக்தியுள்ளது கடவுள் என்று நினைத்தோம், வளர்ந்த பிறகு எங்கள் பாட்டன், முப்பாட்டன் என எங்கள் முன்னோர்கள் கல்வி கற்காமல் இருந்ததன் காரணம் என்ன என்று கேட்டால்... சாதி, மதம் என கடவுளின் காரணங்கள் தான் பதிலாக கிடைத்தது. ஏன் இப்படி பொய் கதைகளை சாமிகளை வளர்க்க வேண்டும்?

இந்த கடவுள்தான் நம் முன்னோர்களை கல்வி கற்க வழியில்லாமல் வளர்த்தது. இன்று  தொழில் செய்வதற்கு படித்த அடிமைகள் வேண்டும் என்ற கட்டாய காரணத்தால் எங்களையெல்லாம் பள்ளிக்கு வரவழைத்து விட்டு அந்த கடவுள் தான் எங்களுக்கு கல்வி கொடுத்தது அதனால் அதற்கு விழா எடுத்து கொண்டாடவேண்டும் என்று சொல்வது மொக்கையான களவாணித்தனம். இதையும் புரியாமல் நம் மக்கள் இதனை கொண்டாடி தம்மை தாமே தொலைக்கிறார்கள்.

இந்த கல்விக் கடவுளுக்கு சக்தி இருந்தால் இந்தியாவில் உள்ள அனைவரும் கல்வி கற்றவர்களாக இருக்க வேண்டும். இன்னும் நம்மால் 100% கல்வி கற்ற நாடாக முடியவில்லை, இதுல படிப்புக்கு ஒரு கடவுள் அதற்கொரு விழா... தூ.... அந்த கடவுளும் இல்லை அது வந்து நமக்கு கல்வியையும் கொடுக்கவில்லை. கற்றவன் அடுத்தவனுக்கு கற்றுத் தந்தாலே நாம் அனைவரும் கற்றவர்களாக இருந்திருப்போம். அதை விடுத்துவிட்டு எல்லாத்துக்கும் சாமியை கண்டுபிடிச்சு அதை வைத்து பிழைக்கும்  இந்த .... பிழைப்பை என்னெவென்று சொல்ல?